అభినందన కల్హారము

శ్రీః
వ్యాస పౌర్ణమి - శ్రీముఖ ఆషాఢం
3-7-1993
శనివారం
విజయనగరం



ఆధ్యాత్మిక జీవనులు - శంకరభావనులు, బ్రహ్మశ్రీ ధవళ శ్రీరామావధాని గారికి వారి సహస్రచంద్ర దర్శనోత్సవ శుభసమయంలో గురుపూజామహోత్సవంనాడు శ్రీ శంకరమఠం - అద్వైతసభ కార్య నిర్వహకవర్గం సమర్పించు అభినందన కల్హారము
సాధుజీవనా!
ఆర్ష సాంప్రదాయ పరిరక్షణమే ధ్యేయంగా, వేదాధ్యన-బోధనలే లక్ష్యంగా, ప్రస్థానత్రయమే జీవనప్రస్థానంగా సాగుతున్న మీ జీవితం ఆధ్యతన మానవాళీకి ఆదర్శనీయం. ఆ బాల్యం వైదిక నిష్ఠావర్తనువై ధర్మో రక్షతి రక్షితః అన్న ఆర్ష సూక్తికి నిదర్శనంగా నిండుజీవితాన్ని పండించుకున్న మీ వ్యక్తిత్వం అస్మదాదులకు ఆదర్శనీయం

లోక కల్యాణ హితైషీ! మనుషుల మహర్షీ!
ఎనిమిదిన్నర దశాబ్దాలకు పూర్వం, గుడివాడ గ్రామంలో, నరసమ్మా వెంకటసోమయాజి పుణ్యదంపతుల గర్భశుక్తిముక్తాఫలంగా ప్రభవించినమీరు ప్రాథమిక విద్యాభ్యాసానంతరం, సాలూరు - విశాఖ - విజయనగరాలలో వేదాధ్యయన సంపన్నులైనారు. పరమగురువులు బ్రహ్మశ్రీ ఆర్యసోమయాజుల పార్వతీశ్వర అవధాని గురుచరణుల అంతేవాసులై గురుప్రభోధిత ప్రస్థానంలో ఎంతో వాసిగాంచారు. తొలుత విజయనగర సంస్థాన వేంకటేశ్వరాలయంలో వేదపారాయణ నిర్వహణం, తరువాత రాజపురోహితులు బ్రహ్మశ్రీ ద్వారకాభమిడిపాటి సుబ్రహ్మణ్యశాస్త్రివర్యుల సహవాసంతో రాజకుటుంబ ధర్మకార్యాచరణం, ఆపై కంచి పరమాచార్య శ్రీ శ్రీ శ్రీ చంద్రశేఖరేంద్ర సరస్వతీస్వాములవారి విజయనగర ఆగమనంతో, వారి శుశ్రూషాభాగ్యంతో, వారి అంతేవాసిత్వం, డాక్టర్ బెజవాడా గోపాలరెడ్డిగారి సమక్షంలో శంకర ప్రతిష్ఠా నిర్వహణంతో శంకరమఠాన్ని రిజిష్టరు చేయించి నేటివరకూ శ్రీ శంకరమఠ సర్వతోముఖాహివృద్ధికై అహోరాత్రాలు కృషి చేసే మీరు, మనుషలలో మహర్షులు. లోక కల్యాణ సంధాతలు.
ఇవికాక, శృంగేరీ పీఠాధిపతులు, కుర్తాళం స్వామివారు, ఉడిపి దక్షిణాదిమఠం స్వామి వారు, జియ్యరుస్వామివారిచేత సత్కరింపబడ్డారు. రాష్ట్ర ప్రభుత్వ పురస్కారం, స్థానిక రోటరీ లయన్స్ క్లబ్ ల వారు కూడా సత్కరించారు.

ఆర్ష విద్యాభూషణా!
వైదిక మార్గ నిష్ఠా ధవళయశోవిరాజితం మీ గేహం. ఋగ్వేద యజుర్వేద స్మార్తాధ్యయన విభాసితం మీ దేహం. రాష్ట్ర రాష్ట్రేతరాల్లో మీరు గావించిన ప్రతిష్ఠలు విజయనగర వైదికలోకానికే ప్రతిష్ఠాకారకాలు.

కంచిపరమాచార్యుల శతజయంత్యుత్సవ వత్సరంలో వ్యాసభగవానుని జయంతి పర్వదినాన సహస్రచంద్రదర్శనోత్సవాభిరామువైన మీకు శతశరద్దర్శనోత్సవాన్ని కూడా నిర్వహించే అదృష్టాన్ని మాకు ప్రసాదించమని ఆ వేదపురుషుణ్ణి వేడుకుంటున్నాం.

మీ జన్మవంశ విద్యావంశాలు కల్యాణపరంపరతో కలకలలాడాలి. సర్వేశ్వరుడు మీకు శతవర్షాధిక ఆయుర్భాగ్యంతో ఇతోధిక ఆరోగ్య భోగభాగ్యాలు ప్రసాదించిగాక!

భవదీయులు
శ్రీ శంకరమఠ కార్యనిర్వహకులు
విజయనగరం

పద్యపుష్పోపహారము

శ్రీముఖ వ్యాసపౌర్ణమి
తేదీ 3-7-1993

శ్రీరస్తు, శ్రీమత్పరదేవతాయైనమః

బ్రహ్మశ్రీ వేదమూర్తులు, బ్రహ్మనిష్ఠులు, తపస్సంపన్నులు, శ్రీ ధవళ శ్రీరామావధాని మహోదయులకు, వారి సహస్రచంద్ర దర్శన మహోత్సవ సందర్భమున సమర్పించిన పద్యపుష్పోపహారము

శా||
శ్రీవాణీహిమవద్గిరీంద్రతనయాసీమంతినుల్ ప్రేమనెం
తే వక్షోముఖపార్శ్వ భాగములయం దేపారగా నొప్పు నా
శ్రీ వైకుంఠవిధీందుశేఖరులు పేర్మిన్ బ్రోచుతున్ వేదవి
ద్యావాచస్పతి నీ బుధున్ ధవళ వంశాంభోధి రాకాశశిన్


సీ||
ఏబదేండ్లకు మున్నె యెంతయు భక్తితో
జంద్రశేఖర యతిస్వామి విమల
పాదపద్మమ్ములు స్వాంతమ్మునన్ నిల్పి
యర్చించునట్టి పుణ్యాత్మకుండు;
శంకరమఠము విజయనగరంబున
నెలకొల్పినట్టి ధన్యులను మిన్న
వేదమూర్తియు, శ్రౌతవిద్యావివేకియు,
మంత్రమూర్తియునైన మాన్యతముడు

గీ||
ప్రేమతోడుత నన్ను నెవ్వేళగాంచు
నట్టి మామక మాతులు ననవరతము
గొలుతు సధ్బక్తి గురుమూర్తి నలఘుయశుని
ధవళ వంశ్యు శ్రీరామావధాని, ననఘు

శా||
వేదోపాసనచే బవిత్రులయి సద్విఖ్యాతి నార్జించుటే
కా దెన్నోక్రతువుల్ పొనర్చి త్రిదివాగ్రస్వాస్థ్యముం గాంచి రెం
తే దాతల్ మఱితండ్రు; లాసరణినట్లే పూని మీ వంశమ
ర్యాదని నిల్పితి, రీవు నీయనుజు లార్యా! రామనామాంకితా!


చం||
ఎనుబదినాలుగేండ్లు చనియెన్ గడులెస్సగ; వేదపూరుషుం
డనియె శతాయువంచు; నటులౌటగొఱంత యెకింతలేక నీ
వనఘ! శతాయురున్నతి, ననామయభాగ్యముగాంచి, సత్తపో
ధనము గడించి మించుమ, నితాంత యశోనిధివై సుఖింపుమా!

చం||
పరమకృపావతారుడయి భవ్యతపోనిధియైన చంద్రశే
ఖరయతిసార్వభౌముల యఖండకృపారస మెల్లవేళదా
బరగగనీపయిన్, సకలభద్రములన్ గని, యస్మదాదులం
దఱకిని మార్గదర్శివయి, ధన్యులజేయుమి వేదవిద్వరా!


ఇట్లు,
వినీతుడు, మధురకవి
అనిపిండి వరాహనరసింహమూర్తి
విజయనగరము

సర్వేస్వరావళి-1: తెలుగదేల (పద్యం)

విలువ లేని చోట విగ్రహమేల? చలువలేనిచోట చేరనేల?

చాలారోజుల క్రితం, ఒక కాలేజీకి సంబంధించిన వీడియో ఏమైనా దొరుకుతుందేమనని యూట్యూబ్ లో వెతికా - అసలు ఇప్పుడు కాలేజి ఎలావుందో అని. ఏవో కొత్త ఆడిటొరియం కట్టేరుట అవీ, ఇవీ అని. దొరికింది.

ఏదో వార్షికదినోత్సవం కాబోలు. స్పూఫ్ లు, సినిమాపాటలకి డాన్సులకి బదులు, చిత్రంగా, సంగీతకచేరి జరుగుతున్నట్టుగా అనిపించింది. *** కాలేజీ డే నాడు శాస్త్రీయసంగీతకచేరీయా? ఏమిటీ శుభపరిణామం అనుకొంటూండగానే, వీడియో ఫోకస్ మరోచోటుకి మారింది. కొంతమంది "విద్యార్ధుల గుంపు" పైకి. మీద కచేరీ జరుగుతూంటే, కింద తీన్-మార్ కి శవానికి ఊరేగింపులాంటిది చేస్తూ, "enjoy" చేస్తున్నారు.

కాలం కొంచెం వెనక్కి వెళ్ళింది. నేనుతినే సొల్లుగడ్డి ఏమైనా తక్కువా అని, ఒక సినీ "అప"హాస్యనటుడు, ఇంజనీరింగ్ కాలేజెలో తాగి తూలి ఏవో పేల్తున్నాడు.

కాలం మరింత వేగంగా వెనక్కి వెళ్ళింది. ట్యాంక్ బండ్ మీద కొన్ని విగ్రహాల్ని కొంతమంది “విప్లవకారులు" కూల్చెస్తున్నారు.

పై మూడు సంఘటనల్లో నాకు పెద్ద తేడా కనిపించలేదు. మనకు నచ్చకపోయినా, వంటపట్టకపోయినా, అది మన వారసత్వసంపద అని గుర్తెరగకపోయినా, కనీసం వాటి విలువేంటో తెలుసుకొంటేచాలు. అదీ కొరవడిందీరోజుల్లో.

మొదటిరెండు సంఘటనలు జరిగినవి తెలంగాణాలో కావు - సినిమాల్లో అత్యంత రొమాంటిగ్గా, ప్రత్యేక తెలంగాణావాదుల హృదయాలు గాయపడేలా, తెలుగుదనానికి పట్టుకొమ్మలు ఇవిమాత్రమే అనిపించేవిధంగా చూపబడే ప్రాంతాల్లోనే జరిగాయి. కనీసం ట్యాంక్ బండ్ మీద జరిగినదానికి, మంచో చెడో, ఒక ప్రేరణైనా ఉంది. కొంతమంది వ్యక్తుల దురాలోచనవల్ల మాత్రమే జరిగింది. మిగతావి చాలా సాధారణంగా జరిగినట్టు అనిపిస్తాయి. కానీ వాటి వెనకనున్న సమస్య ఒక్కటే.

మనం విచారించవలసిని విషయం, ఆలోచించవలసిన విషయం, ట్యాంక్ బండ్ విగ్రహాల పై దాడికన్నా తీవ్రమైన, విషమమైన సాంస్కృతిక రంగాలపై నిర్లిప్తత, నిరాశక్తత, అవగాహనారాహిత్యాలపై. కంటికి కనిపించకుండా ధ్వంసమవుతున్న జాతి మూలాలపై.

సమాచారవిప్లవం వచ్చినతర్వాతకూడా, వీటిని పరిరక్షించే బాధ్యతతీసుకోకుండా, కాపాడే హక్కుకోసం పోరాడ్డం - ఉన్న పరిమితవనరుల్ని దుర్వినియోగపరచడమే అవుతుంది. ఆ పరిస్థితులు నెలకొల్పనంతవరకూ -

విలువ లేని చోట విగ్రహమేల? చలువలేనిచోట చేరనేల?